Lav Lasiet Dan Lepok Margoz

Lav Lasiet Dan Lepok Margoz.

Avan pa ti ena robine dilo
Dan sak lakaz kouma zordi.
Ti pe bizin al sers dilo lafontain.

Zordi zour tou dimounn ena
Plizier robine dan tou koin lakaz.
Robine plis ki dilo mo dir ou.

Lakwizinn sink zetwal mama.
Robine sofistike e levier
Dernier model pou lave lasiet.

Me li bon ki nou rekonesan
A bann soeur e mama kinn
Bien soufer pou lave lasiet avan.

Zot ti pe bizin al sers dilo loin pou
Amen kot zot pou ranpli de deksi
E asiz lor zot lipie  pou lave  lasiet.

Pa ti  ena marsan Rs 50 galon kres,
Pa ti ena pinky et ti pe bizin servi
Lapay koko, pay defer e bar savon.

Kann fini pass savon, ti pran lasiet
Tramp dan premier deksi e retir
Li pou rinse dan deziem deksi.

Kan fini, verse li lor enn fey tol
Pou li degoute  e apre ramas
Goble,lasiet,deksi,karay endan.

Faude pa blier dan ki leta bann
Deksi, karay ti ete kann sort lor foye.
Saki Inn lave ki kone.

Avan pa ti mem ena lakwizinn
Endan lakaz ,ti pe kwi dehor
E ti pe lave lasiet dehor.

Dan lapli,dan solely,dan saler,
Dan freser, dan gramatin,dan tanto,
Lasiet ti  bizin lave pou kapav manze.

Zot Inn bien manz zot margoz amer
Pou donn nou manze dan enn lasiet
Prop e fer nou grandi bien.

Pillay
6.04.19