Wednesday, June 10, 2020

Tape Latab, Tape Latab!



Ena pe tap latab,
Ena pe dres latab.

Ena pe bes gaz,
Ena pe rann gaz.

Ena pe sofe,
Ena pe resofe.

Ena pe koz det,
Ena pe koz tablet.

Ena pe ogmant pension,
Ena so tension pe monte.

Ena pe kont so sou,
Ena pe fer labous dou.

Ena pe koz elektion,
Ena pe koz deseption.

Ena pe koz lanpool,
Ena pe koz Liverpool.

Ena pe glase dan freser,
Ena pe glase devan kamera.

Ena pe tap latab dan mo malher,
Ena pe tap latab dan mo bowner.

Pillay

Tuesday, June 2, 2020

Merkato Dan Moris

Tan dir Ravi pe al Liverpool
Tan dir Kevin osi pe al Liverpool
Tan dir Dylan osi pou al Liverpool.

Sezon pa enkor termine
Ena zouer zot lespri lor lot lekip,
Zot pe panse gazon pli ver dan lot lekip.

Toulezour zournal p anons enn zouer
Pe zoin Liverpool dan bann prosein zour,
Tou le zour ena zouer pe rod kit zot ansien klib.

Bann ki pe dir ki zot leker bat zis pou Manu,
Zordi inn vinn pli gran fans Liverpool
E zot pe al met lake pou al Liverpool.

Parey kouma zoke sanz kazak,
Zordi nou trouv zouer osi pe sanz mayo
Ki zot ti pe admire pou met saki zot ti deteste.

Zot pe panse klopp pou ramas zot tou
Zot pe krwar zot plas garde dan Liverpool
E ki zot garanti ki zot pou lev koup.

Zot pa pe panse ki zot kapav al sof ban
Oubien zoue zis pou lekip reserve
E olie gann koup zot riske gagnn koupie.

Sa bann karapat la ti bisin pran leson
Avk ban fans, zouer ale, zouer vini,
Zot res fiddel e zot pa al rod bout.















Shapo A Bann ki .......

Shapo a bann ki inn konn
Enn lenfans difisil
Me ki fer tou pou ran
Lavi lezot zanfan fasil.

Shapo a bann ki pann
Gagn boukou lamour
Me ki fer tou pou don
Lezot boukou lamour.

Shapo a bann ki ankes
Tou kalite kou avek zot tou
Me ki fer tou pou
Pa don lezot auken kou.

Shapo a bann ki sibir
boukou boukou linzistis
Me ki fer tou pou ki
Lezot kapav gagn lazistis.

Shapo a bann ki pa atan
Ki zot pei fer pou zot
Me ki fer tou pou ki
Zot pei progrese pli divan.

Shapo a bann kinn
konn lamizer nwar
Me ki fer tou pou
Tir lezot dan lamizer nwar.

Shapo a bann ki pann
Gagn lasans develop zot talan
Me ki fer tou pou ki lezot
Kapav develop zot talan.

Shapo a bann ki lavi pann
Fer zot auken kado
Met ki pe fer tou pou
kapav ofer lezot kado.

Shapo a bann ki kapav
Pe plere dan zot koin
Me ki kasiet zot larm
E fer tou pou lezot riye.



Lane Inn Vini Lane Inn Fini

Nou ti atan lane fini
Pou nouvo lane vini
Nou louvraz inn fini
Nou shopping inn fini.

Nou bonis inn vini
Nounn aster saki nou anvi
Avan mem ki ariv minwi
Pou nwel et lane ki inn fini.

Gros lapli inn vini
Syklonn ousi inn vini
Syklonn inn bien tini
Syklonn pou revini.

Reveyon inn vini
Reveyon inn fini
Tou petar inn fini
Nouvo lane inn vini.

Fami inn bien vini
Tou manze inn fini
Tou bwar inn fini
Tou Kas inn fini.

Nou inn vinn touni
Nou bizin tini tini
Ziska fin zanvwe vini.
E atan lot lapey vini.

Koson Dan Parc Koson

Mo inn ne kouma tou zanimo.
Me dimoun inn batiz mwa koson.
Mo kousin sek apel koson maron.

Souvan bann dimoun fer referens
A mwa me sa pas pou fer diferens
Paraki zot pa fer mwa auken preferens.

Zot dire mwa to enn gros koson,
To manze kouma enn gros koson,
E to dormi kouma enn gros koson.

Zot dir mo viv dan enn park koson,
Zot pez nene kann zot trouv koson,
Zot vir zot ledo kann zot trouv koson.

Zot kompar mwa avek tou saki pa bon,
Zot pran mwa pou enn gros boufon
Koumadir lor mo fron inn ekrir boufon.

Zot mem gagn letan vey mo ti lake
Zot mem gagn osi letan pas komenter
Lor mo ti lake ki zot trouv li inpe tourne.

Mo ti lake li kapav res tourner
Me mo pa fer kitsoz traver
Mem si tou letan mo tan koze kontrer.

Kann zot fini touy mwa, sa mem labous
Kinn assez trait mwa de tou kalite non
Pou fini par trouv mwa mari mari bon.






















Saler Pe Donn Bal


Saler pe donn bal,
Saler pe fer gagnn dimal,
Saler pe fer nou bwar dilo vital,
Pou pa al kraze dan nou lopital.

Parfwa lapli osi pe don bal,
Lakaz pe ranpli ar dilo kanal,
Pe bizin oblize bwar dilo sal,
Kan pa kakav aster dilo crystal.

Ena pe rod tir tou sal
Apre pe dir louvraz pe don bal
Entier lekor pe mari fer mal
Pou bizin fer reveyon dan lopital.

Moustik e kankrela pe fer bal
Akoz saler pe don bal.
Pe bizin alim sandal
Pou ampes zot fer bal.

Sovsouri pe fer bal,
Pe bizin ramas lagrain par bal.
Laval pe bizin aster leksi par bal
Pou partaz Pascal, Nirmal e Jamal.


Ena pe fer foufamal,
Pe bwar e manz golmal
E sa pou fini bien bien mal
Dan boukou nou lopital.

Petar pou don bal pou final
Mem si zorey pou fer mal
Mem si pos pou gagn dimal
Mem si lisien pa pou fer bal.

Saler pe donn bal
Me pa p kapav al fer bal
Lamer, parski lotel pe fer bal
Ar nou lamer e nou later natal.

Met Lake Partou kote.

Ou al tir kas ou met lake
Ou al lopital ou met lake
Ou al sinema ou met lake.

Me dan NTa ki ou kone ki apel lake.
Pou tir ou numero bizin met lake
E re met lake pou ou pase.

Kan ou guet sa longer lake
La ou kone ki ounn tase
E pa pans pou leve ale.

Kan ou bizin tir papier gaz
Si ou pena assez Kouraz
Ou riske fer laraz e ran gaz.

Kan ou fini dan enn biro
Ou bizin al dan enn lot biro
E apre retourn dan mem biro.

Kan pou aret fer yo-yo ar nou
Kan pou trait nou avek respe
Pou enn servis ki nou peye.

Ala Nisa La Monte Dan Metro.

Bann morisien inn reusi gagnn zot metro.

Pou fer nisa la monte dan metro,

Lotorite pe don tiket metro kado.

Me bizin met lake pou gagn tiket kado.

Apre pran bis al atan lor lagar metro.

Bann ki gagn gastro, bliye vwayaz dan metro

Paski metro pa pou aret kot karo.

Bann ki kontant dodo kann vwayaze, blie metro.

Parski laplipar pasaze pou bizin fer port marto.

Kann vwayaz dan metro bizin Konn chombo,

Sinon ou riske tom par ledo dan metro.

Pa met savat dodo Kan vwayaz dan metro,

Parski savate riske tas dan rel metro.

Kan nisa la pou aret monte dan metro,

Pa kone kombien pou kit loto pou mont dan Morisio.

Lafin Dimwa Pa Enkor Vini Bonis Fini Vini

Sa lane lane nou pou gann bonis avan.
Tou bann komersan pe mari kontan
Parski zot pou gagn plis letan

Pou devid nou pos e rempli zot pos.
Nou travayer nou kontan nou bonis
Me prosain lapey li loin e pena bonis.

Avan mem ki nou tous bonis, nou lalis
Li bien long e pe bizin tir saki enplis
Mem si sa kapav fer nou bien tris.

Enn kote zenfan pou manze ou lavi.
Kan zot koumens rempli kado dan kadi
E lot kote bann komersan bien tir lavi.

Zot bien kouyonn dimounn avek zot
Swadizan promotion fin dane ki zot
Servi pou plim nou dan zot kazot.

Avek kado, shoping, double ration,
Fet fin dane e tou sa bann tentation,
Nou pa pou roule lor zent me lor reyon.

Bann ki kontan pli glasse la fin lane
Bann ki kontan fer show off pou lane
Bann ki kontan sonn pertar pou lane

Pou bisin pense bien loin sa lane la
Parski zot riske gagnn pli so sa lane la
Parski zot kas pou evapore vite sa lane la.














Promo, Kado e Fardo

Afors pe fer so,
Pa pe kone si pou reysi dodo.

Afors pe fer so,
Pa pe kone si pou gagn dilo koko.

Afors li pe koz siro,
Pa pe kone si li merit so kado.

Afors ena pou aste kado,
Pa pe kone Kan pou gagn repo.

Afors pe gagn panfle kado,
Pa pe kone si sa pou tom lor nou ledo.

Afors partou pe met promo,
Pa pe kone kot pou gagn plis kado.

Afors ena louvraz a gogo,
Pa pe kone kot pou gagn dilo.

Afors ena boukou loto,
Pa pe kone kot pou park loto.

Afors nou lizye gros,
Pa pe kone si tou pou rant dan loto.

Afors ena boukou pe rod tiket metro,
Pa pe kone kan pou reusi bat metro.

Afors pri legim pe fer tempo la so,
Pa pe kone kouma pou sarye nou fardo.

Afors zenfan zordi zour pa le zwe lego,
Pa pe kone ki zouzou pou don kado.















Bufe Ouver Fer Vent Ouver


Kouma nou tann bufe ouver
Nou vent fini koumans ouver
Bien avan mem ki nou dekouver

Ki ena lor tou latab pou manze.
Nou servo fini desid pou manz
Tou saki enna dan bufe ouver.

Kouma nou ariv lor baz manze
Nou lizie vin pli gros ki nou vent
E nou pa donn letan pou atake.

Montagn mem fel r oter nou pla
E nou bien pa kas nou latet r sa
Parski nou pa pey en plis pou sa.

La, mem bann gran doner leson
Fini par aval zot bann bon fason
Manze e koumans zot operation

Kas dan ta e pou konsol zot mem
Zot dir dime zot pou tir sa mem
Avan Kan zot al gym pou zot 'train'.

Enna pa zis res manze ziska lagoz,
Zot res kontinn bwar kouma koson
Ziska zot kat larou enler lor gazon.

Enna afors inn res antone mem
Koumadir zame inn trouv manze
E vomi tou manze lor gazon mem.

Mem kann nou dan enn bufe ouver
Nou enna inpe tristes kan nou ouver
bin e nou trouv kantite manze ki zete.

Bufe ouver inn fer pou nou apresye
Enn varyete manze me nou latitude
Gros lizie pa le sanze e pa pou sanze.
















Viv Kouma Sat Ek Lisien


Sat enn zanimo ki res dan lakaz,
Lisien enn zanino ki res dan lakaz,
Me ki zot pa res ensam dan lakaz.

Tou le de konn zot travay dan lakaz
Me zot pa fer mem travay dan lakaz
Sinon zot pou fer pli boukou laraz.

Mem si zot fer laraz kan zot de zoin.
Me zot pa fatigue pou okip tou koin.
Kan zot la lera e voler res bien loin.

Kan sat pa dan lakaz lera fer bal
Kan lisien pa dan lakaz voler fer bal
E proprieter lakaz ki trouv zetwal.

Me proprieter pa kompran ki fer
So de zanimo prefere pa le rod fer
Lape e pa pe les zot 'ego' dans later.

Proprieter pa enkor fini konvaink
So gran sat e so gran lisien pou
Met frein e aret viv kou sat e lisien,

Ala ti sat et ti lisien pe pran relev
zot inn vinn bien vite ban bon zelev,
E sa mem ki nou dir dilo suiv kanal.

Mem si sa pe fer leker bien fer mal,
Sat ek lisien pe kontinn res foufamal
Parski tou le de pe kontinn deklar mal.

Kouma li ti pou zoli si zot ti aret sa lavi
Sat ek lisien la e pa viv kouma lenemi
Parski lisien pa pou la pou pran set lavi.

Elektion Inn Fini.

Elektion Inn Fini,
Ena inn ramas lareg dan sac
Ena inn ramas TSqwer dan sac.

Elektion Inn Fini,
Enna inn tap plein
Ena inn perdi lor tou terein.

Elektion Inn Fini,
Ena pou al rod patant
Ena inn fini ran zot patant.

Elektion Inn Fini,
Enn inn sorti dan karo zanana
Ena inn retourn dan karo zanana.

Elektion inn fini,
Ena pa ti gagn tiket avan elektion
Ena pe gagnn tiket apre elektion.

Elektion Inn Fini,
Ena pe atan Kan pou dir zot pran.
Ena pe swazir ki bout zot pou pran.

Elektion Inn Fini,
Ena pe dire zot pena lasans.
Ena pe al pran zot vakans

Elektion Inn Fini,
Ena inn koup kontak,
Ena inn gagn nouvo lakle kontak.


















Tousa La Mama


Tousa tayer ena la
To tay mo mem.

Tousa kwafer ena la,
To kwaf mwa lor poto.

Tousa vol(avion) ena la,
Pe kontinn trouv voler.

Tousa poutou inn aste la,
To dir mwa pena pou mwa.

Tousa kas to gagne la,
To kas to latet mem.

Tousa loto to ena la,
To rod gagn loto.

Tousa kou to riy dan moustas la,
To moustas res enplas mem.

Tousa gros pwa to manze la,
To pa pe pran pwa.

Tousa prekosion to pran la,
To tension res monte mem.

Tousa promotion ena la,
To pa pe reusi tir ration.

Tousa fans liverpool ena la,
Lefwa pool enkor vann ser.

Tousa pomme damour to manze la,
To pena ditou lamour prop.

Tousa pistas to manze la,
To sinema la kontinie mem.

Tousa lapli pe tombe la,
To reservwar pa le ranpli.

Tousa dite to bwar lakaz la,
To al rod enn dite andehor.

Tousa dal monn fane lakaz la,
To pe dir mo pa koul dal mo lakaz.

Tousa kout pie tonn gagne la
Tou pe rod enkor koup.

Tousa dou to bwar la
To lavi li enkor amer mem.












Mo Salue Bann Solda

Mo salue tou bann solda
Kinn lor battlefield pendan
Plizier semaine.

 

Mo salue tou bann solda
Kinn kit zot lakaz e zot fami
Pou al defan zot pei.

 

Mo salue tou ban solda
Kinn met zot lavi en danzer
Pou sov zot pei.

 

Mo salue tou bann solda
Pou zot kouraz ki zot montre
A sak fwa ki zot pei bizin zot.

 

Mo salue tou ban solda
Ki pann dormi pou ki lezot
Kapav dormi trakil.

 

Mo salue tou ban solda
Ki pann rekiler devan
So adverser dangere.

 

Mo salue tou bann solda
Mem si zot gagne ou perdi
Lagir ki zot pe participe.

 

Mo salue tou ban solda
E mo ti a swete ki tou sitwayen
Gagn mem mindset.

Kan Mo Merit Enn Bon kout Pie

Monn aste enn mouswar avk mo kas.
Mo dir mo kamouad atas sa otour mo labous.

 

Monn aste enn lakord avek mo kas
Mo dir mo kamouad atas mo lame e mo lipie.

 

Monn aste enn reban avek mo kas
Mo met sa pou pa trouv ki pe pase otour mwa.

 

Monn aste enn earphone avek mo kas
Mo met sa pou pa tan ki pe pase otour mwa.

 

Monn aster enn smart phone avek mo kas
Mo tap lame kan mo kamouad pe vey mo zafer.

 

Monn aste enn smart tv 65 pous avk mo kas
Mo kapav pli apresie kan pe kouyonn mwa.

 

Monn al liniversite avek mo kas
Mo riye kan mo kamouad kouyonn mwa.

 

Si mo grand per konn sa, li pou sorti dan so tom
E li pou bez mwa enn bon kout pie ki mo merite.

Divali Pe Vini, Elektion Si Pe Vini

Divali pe vini, elektion si pe vini
Ena boukou louvraz dan lakaz
Ena boukou travay dan baz.

 

Ena zot shoping pa enkor fini
Ena zot promes pa enkor fini
Parski zot pa envi perdi.

 

Ena pou partaz gato divali
Ena pou partaz pepsi e briani
Pou fer boukou dimounn vini.

 

Ena enkor pe panse ki gato pou kwi
Ena pe panse ki kandida pou vote zedi
Pou ki zot mizer nwar fini.

 

Ena pou son petar pou divali
Ena pou son petar kan zot leader vini
E ena pou son petar si zot reusi eli.

 

Ena pou gagnn kado pou divali
Ena pou gagnn kado kan elektion fini
Me ena zot figir pou vinn kouma dipain rasi.