Voler Lavi

Voler Lavi

Person pa inn ne voler,
Me de pli en pli pe gagn
Pli boukou voler, vloer dan biro,
Voler dan karo, voler loto,....

Nou compran ki ena travay bien
dir pou fer progre dan lavi,
E zot pa kontan ki voler vin
koken kot zot e ran zot lavi dir.

San zour pou voler enn zour
Pou propriyeter ki res vey voler.
Zour li atrap voler li fer li pey
Lepo kase avk led so ban kamarad.

Avan kan pa ti ena lalwa,
Si enn dimoun grainn ou leden
Ou pa ti bisin hesite et ou
Ti kapav grainn so 32 leden.

Aster nou apel nou enn pep
sivilise, eski nou bisin pran
Lalwa dan nou lame ?
Koumadir nou mem lapolis e ziz!

Kouma nou trouv inn gagn
enn voler, nou al donn koudeme
Pou rinse olye ki nou apel lapolis
Pou fer so travay.

Nou bat voler san pitie
E nou mem defoul nou lor li,
Nou kontinn bate ziska
ki nou fatige bat li.

Apre inpe zour tan dir
Voler la inn mor,
Ki nou inn repros voler la,
Linn koken kas, bizou, legume...?

Me eski nou realise ki noun
kokein so lavi e ki zame,
Nou pou kapav rembourse
Ni li ni so fami.

Malgre sa act barbar la,
Nou fier ki nou inn koriz voler,
Me pli gran voler kisana?
Voler obze materiel ou voler lavi?

Person pa in ne voler,
Eski nou kone ki fer enn dimoun
Vin voler? Ki drwa nou ena
Pou vin voler lavi dimoun?

Lalwa in kre pou aret voler,
Ziz zot e condan zot.
Pa inn ariv ler pou ki nou aret
Kokin obze materiel e lavi lezot?

Pìllay