Nwar, Nwar, Nwar Do Mama...

Nwar, Nwar, Nwar Do Mama..

Avan li pa ti difisil
Pou nou graparan
Viv dan nwar.

Zot ti pe servi lalamp
Petrol, lalamp later
E labouzi kan fer nwar.

Zot ti koumans kwi
Boner, manze bonher
E al dormi bonher.

Dan gramatin zot ti pe
Leve avan kok sante
E bien avan soley leve.

Me zordi nou inn vinn
Esklav elektrisite pou viv,
Sirtou kouma fer nwar.    

Bizin elektrisite pou kwi,
Bizin elektrisite pou wifi,
Bizin elektrisite pou guet seri.

San elektrisite nou telefon
Fix e reso mobil retourn zero.
Sa fer nou questionn progre.

San elektrisite san rezo
Kapav zis servi telefon mobil
Kouma tors kan pena labouzi.

San elektrisite kamera aret
Vey nou lakaz e voler profite
Pou fer nou retourn nwar touni.

Si Jacques Cantin ti enkor vivan,
Li ti pou re sant: Nwar, Nwar,
Nwar do mama......

Pillay
03.05.19