Pakone Ki Pou Kwi Zordi
Nou ti pe rod lapli,
Gro lapli inn vini,
Gro lapli inn fini.
Nou pa ti anvi syklonn vini,
Plizier syklonn inn vini,
Me zot pan fer nou touni.
Nou pa ti anvi Corona vini,
Corona pe met nou konfi,
Ek pe fer nou vinn touni.
Nou Kas pre pou fini,
Ena pe kasiet deryer li,
Pou tir nou lavi ar zot pri.
Pakone ki pou kwi zordi,
Kann tou legim inn fini,
Mem pye papay inn touni.
Pa fer figir vinn dipen rasi,
Bizin konn tras lavi avek saki
Pa enkor fini ziska zordi.
Avan gaz dan la kwizinn fini,
Fer kouma nou nani ek nou dadi,
Fer enn kitchiri ek so sanitini.
Fer enn bon rougay touni,
Tras enn bon zasar bilinbi,
Manz avek enn bon lapeti.
Pillay
10.04.20
No comments:
Post a Comment