Lavi Bann Gros Dimounn

Lavi Bann Gro Dimounn.

Dimounn Inn touzour apel
Saki gro par toukalite nom,
Zot ena enn lalis nom pou
Dimounn ki gro.

Gro fie, gro garson,
Gro boudouf, gro patat,
Gro motek, gro motoo
E enkor enn long lalis.

Zame zot  pran lapen
Pou apran zot vrai nom,
Zot  deklar zot koumadir
Zot mem ofisie leta sivil.

Saki gro ti kwar ledikation
Pou sanz manier pense sertein.
Zot inn sanz zot vokabiler
Me zot kontinn imilie dimounn.

Defwa avan mem dir dimounn
Bonzour zot pa hezite pas zot
komenter gratis lor lezot so lekor
Kamadir zot ki donn manze.

Enn gro dimoun bizin kasiet
Kann li manze, sinon tou kalite
komenter koumadir pe don santini
Pou manze la rant pli bien.

Pour sertain enn gro dimoun
Li pa gagn drwa manz so
Manze trankilment oubien
Li bizin mor sann manze.

Ena krwar ki sa bann komenter
La pou fer li gagn enn meyer sante.
Me zot pa realise kouma sa pli stress li
E sa pe touy li dousman dousman.

Enna servi facebook pou kontinn
Zot villain manier imilie saki gro
Mem si ena mil fason pou fer nou
Kamarad riye avek nou bann post.

Me kifer bizin servi saki gro pou fer
Lezot riye? Ki zot Inn ne pou servi
Pou fer lezot riye. Si ou bien kontan
Fer lezot riye, rant dan komiko!