Monday, June 1, 2020

Tou Dimounn Pe Deklar Mari

Tou Dimounn Pe Deklar Mari

Avan zis bann mari ki ti abitie fer mari.
Aster fam osi fer mari avk zot mari.

Zenfan si fer mari avk zot papi e mami.
Tizanfan osi fer mari avek zot nani e dadi.

Ena koumadir inn gagn permi pou fer mari.
E afors zot  fer mari zot fer nou dans toupi.

Saki  ena pitay trouv li normal pou fer mari.
Mem saki enn nwar touni ousi deklar mari.

Lor lari saki roul bel baniol fer mari.
Lor lari saki ena gros masinn osi fer mari.

Dan klas ena saki malin deklar mari.
Dan klas saki ena gros lebra fer mari.

Dan lendrwa bann saki ena sato fer mari.
Dan travay kouma zot vinn boss zot fer mari.

Dan parlman ena servi zot pouvwar pou fer mari.
Dan shopping mall proprieter fer mari ar pri.

Dan supermarse promotion fer  mari pou nou ranpli
Kadi pou proprieter  kapav roul dan Audi.

Labank kontant don nou loan e apre zot tir mari
Kas sak lafin dimwa ziska nou vinn touni.

Dan nou pei nou zoin enta mari lindi ziska samdi.
Parfwa fer mari so e parfwa fer mari fre dan pei.

Kan ranz lakaz travayer fer mari
E kan lakaz fini ranze, proprieter vinn touni.

Sa mentalite fer mari la pa le fini.
Me zour zot gagn zot mari zot ava bez dan lari.

Written by Pillay
12.02.19

No comments:

Post a Comment